Masteroppgave i regnskap og revisjon

Gjennom arbeidet med masteroppgåva skal studentane vise at dei er i stand til å definere, avgrense og presisere forskingsspørsmål, gjere greie for relevant teori som set problemstillinga inn i ein vitskapleg samanheng, velje relevant metode, gjennomføre ei systematisk analyse og trekkje plausible konklusjonar.

Ein viktig del av læringa består i å utleie nokre praktiske implikasjonar av funna i masteroppgåva. I tillegg skal arbeidet med masteroppgåva dokumentere at studenten er i stand til å skissere nokre problemstillingar for vidare forsking. Det inneber at arbeidet med masteroppgåva, i tillegg til å vise at studenten meistrar vitskapleg arbeidsmetodikk, også er i stand til å setje sitt eige bidrag inn i ein større vitskapleg samanheng.

Kunnskap

• Studenten skal ha inngåande kunnskap og ei grundig forståing for teoretiske tilnærmingar og faglitteraturen relatert til vald problemstilling.
• Studenten kan bruke kunnskap på nye område innan fagfeltet.
• Studenten skal ha avansert kunnskap om ulike metodiske tilnærmingar for innsamling og analyse av tilgjengeleg materiale.
• Studenten skal ha avansert kunnskap om oppbygging av eit vitskapleg arbeid.

Ferdigheiter

• Studenten kan motivere studien ved å argumentere for vald forskingstema og tilhøyrande problemstilling/forskingsspørsmål.
• Studenten kan utvikle ei forskingsbasert hovudproblemstilling med eventuelle tilhøyrande forskingsspørsmål.
• Studenten kan vurdere, velje ut og bruke relevante teoretiske tilnærmingar og metodikk i innsamling, systematisering og analyse av data for å belyse den valde problemstillinga. Dette inneber evna til å reflektere kritisk over teoriens/teoriane si bruk på nye problemstillingar.
• Studenten kan konkludere tydeleg på den formulerte problemstillinga/forskingsspørsmåla som danna utgangspunkt for studien.
• Studenten kan utleie implikasjonar av resultat som kjem fram i studien.
• Studenten kan analysere faglege problemstillingar med utgangspunkt i fagområdet si historie, tradisjonar, eigenart og plass i samfunnet.

Generell kompetanse

• Studenten kan referere til ulike kjelder som er brukte i studien.
• Studenten kan analysere og praktisere fagområdet sine uttrykksformer.
• Studenten kan gjennomføre eit sjølvstendig forskingsprosjekt under rettleiing og skal ha forståing for forskingsetiske normer og utfordringar ved sitt eige arbeid.
• Studenten kan munnleg og skriftleg formidle resultata på ein systematisk og fagleg god måte.