2. praksisperiode
Studenten skal i andre studieår, 3. semester, gjennomføre 20 dagar med praksisopplæring på småtrinnet i grunnskulen, 1.-4. trinn.
Studentane skal observere, planleggje, gjennomføre og vurdere undervisning under rettleiing av praksislærar og faglærar.
Praksisen skal vere rettleidd, variert og vurdert. Sentralt for praksisperioden er:
- Vidare utvikling av eigen profesjonsidentitet og relasjonskompetanse
- Samarbeid med medstudentar, praksislærar og faglærar
- Tilpassa opplæring og vurdering for læring
- Planlegging, gjennomføring og vurdering av undervisning
- Skulen som organisasjon og samarbeid med andre instansar
Emnet er forbeholdt studentar på lærarutdanning i praktiske og estetiske fag for trinn 1-13, musikk.
Krav om bestått praksis første studieår.
KUNNSKAP
Studenten
- har god forståing og kunnskap om innhaldet i og grunngjevinga for dei sentrale styringsdokumenta som regulerer verksemda i skulen
- har brei kunnskap om motivasjon, læring og utfordringar i læringsarbeidet for ulike grupper elevar, og om kva moglegheiter praktiske og estetiske tilnærmingar gir
- kan ta vare på ulike perspektiv og mangfald i skulen gjennom planlegging og organisering av undervisning
- har kunnskap om planleggingsverktøy og vurderingsarbeid
- har brei kunnskap om verdiar, forståing for interesser og normer i ulike barnekulturar
FERDIGHETER
Studenten
- kan lage undervisningsopplegg og grunngje val av mål, innhald, arbeidsmåtar og vurderingsformer med utgangspunkt i didaktisk teori
- kan bidra til at alle elevar i praktiske og estetiske fag får utvikle ferdigheitene sine
- kan bruke digitale ressursar i planlegging, organisering, gjennomføring og vurdering av undervisning
- kan vere ein tydeleg leiar og leie læringsarbeid for ulike elevar, samt kunne rettleie i kollegafellesskap
- kan identifisere åtferd som er utfordrande for elevane si læring og drøfte korleis dette kan handterast
GENERELL KOMPETANSE
Studenten
- har god evne til å reflektere over eigen og andre si undervisning
- har god evne til å samarbeide med praksismiljøet og medstudentar
- har evne til å nytte rettleiing i eigen profesjonsutvikling
- har evne til å kommunisere og reflektere over profesjonsetiske dilemma
Det må påreknast noko kostnad i samband med reise til og frå praksis. Nord universitet gjev tilskot til reiseutgifter etter gjeldande vedtak.
Retningslinjer for økonomisk tilskudd til studenter somgjennomfører praksisstudier ved Nord universitet
FØREBUDING TIL PRAKSIS
Oppstartsmøte og samtalar med praksislærar i forkant av oppstarten av praksisperioden.
GJENNOMFØRING AV PRAKSIS
- Observasjon av undervisninga til praksislærar og medstudentar
- Planlegging og gjennomføring av eigne undervisningsøkter, både åleine og saman med medstudentar
- Evaluering av både eigne og medstudentar sine undervisningsøkter
RETTLEIING
I praksisperioden skal studenten ha inntil 10 timar rettleiing i gruppe per veke. Rettleiinga skal givast både individuelt og i gruppe, og har som mål å støtte læring og utvikling hos den enkelte studenten. Det skal gjennomførast ein individuell midtevaluering og sluttevaluering i praksisperioden.
OPPGÅVEINNLEVERING
Det er tre oppgåver knytte til praksisperioden:
- Forventningsoppgåve
- Fagoppgåve
- Eignevalueringsoppgåve
Desse oppgåvene er knytte til profesjonsfaget.
Nord universitet tildelar praksisplassar i kommunar som institusjonen har samarbeidsavtalar med.
Lærarutdanning for praktiske og estetiske fag omfattar 130 dagar rettleia, variert og vurdert praksis. I tredje semester blir det gjennomført 20 dagar praksisopplæring på småtrinnet i grunnskulen, 1.-4. trinn.
Det skal vere progresjon i praksisopplæringa, og ho skal ha ein integrerande funksjon i utdanninga. Rettleiing og vurdering av praksis er eit felles ansvar for faglærarar, praksislærarar og rektor ved praksisskulen. Utviklinga av studentens kompetanse knytt til lærarrolla skjer i eit gjensidig forhold mellom praksisarena og undervisningsarena.
Løpande skikkaheitsvurdering av alle studentar skal gå føre seg gjennom heile studiet, både i den teoretiske og den praktiske delen, og inngå i ei heilskapleg vurdering av studenten sine føresetnader for å kunne fungere i læraryrket.
Praksis blir vurdert til Bestått / Ikkje bestått.
For å få bestått praksis må studenten, etter ei heilskapleg vurdering, ha oppnådd læringsutbyttet for praksisemnet, ha 100 % oppmøte, samt ha gjennomført og fått godkjent alle oppgåver som høyrer til praksisperioden. Fråvær frå praksis eller manglande godkjenning av oppgåver vil i seg sjølv føre til Ikkje bestått. Studentar som får Ikkje bestått i praksis, må gjennomføre ny praksis i si heilskap.
Oppgåver som høyrer til praksisperioden:
- Innlevering om forventningar til praksis, leverast digitalt i læringsplattforma
- Innlevering av sjølvevaluering, leverast digitalt i læringsplattforma
- Fagoppgåve i profesjonsfaget om praksis med gitt oppgåvetekst
Oppgåvene blir vurderte av aktuell faglærar.
På vitnemålet blir karakterane i alle praksisemne slått saman til éin karakter i praksisopplæring.
Den rettleia praksisopplæringa i studieåret må vere bestått for at studentane skal kunne halde fram med utdanninga i påfølgjande studieår.
Ny / utsett eksamen:
I følgje Forskrift om studiar og eksamen ved Nord universitet har studentar rett til å gjennomføre praksisopplæring to gonger. Ved Ikkje bestått ved første forsøk, må studenten vente til neste gong same praksisperiode blir gjennomført, for å kunne gjennomføre nytt forsøk. Studenten må melde seg skriftleg opp til ny praksis ved studiestart. Ny praksis blir gjennomført etter dei same retningslinjene som ordinær praksis. Studenten vil få skriftleg melding om Ikkje bestått.
