Frå Tyskland til Bodø – klare for nye eventyr

Studiestart 2025 ved Nord universitet, campus Bodø - og mange av dei kom til Noreg og Nord-Noreg for aller første gong.

– Eg har vore i Noreg ein gong før. Då reiste eg saman med foreldra min med Hurtigruten til Nordkapp, fortel Amelie Bruhns frå Freiburg i Tyskland.

Ho kjende allereie Richard Stertz frå same by, då dei reiste til Bodø.

Mathilda frå Kiel møtte dei først då dei kom til Noreg. Alle skal gå Adventure Knowledge, som er eit haustfag i Bodø.

No ser alle fram til å starta studiane.

– Vi elsker naturen; landskapet og fjellene. Alt av utendørsaktiviteter, forteller d– Me elskar naturen; landskapet og fjella. Alt av utandørsaktivitetar, fortel dei.

Akademisk friheit!

Hovudtalar for dagen gav eit litt mørkare bakteppe.

– Dessverre er det slik at leiarar til og med i nokre vestlege land, har byrja å meina at det ikkje er så farleg om noko er fakta. For eg kan ha andre fakta - og mine er like bra. Mange andre døme er farlegare. Det er i nord, der me er no, at utanrikspolitikken er tettast på. Det er her me er tettast på den store naboen vår Russland, som dessverre har plassert seg på feil side i historia. Me ser nye geopolitiske spenningar mellom aust og vest, og ei aukande interesse for nærområda våre. Me legg tollar på kvarandre og me ser at konfliktar og krigar bryt med folkerettslege prinsipp, seier utanriksminister Espen Barth Eide, Ap.

Noko av svaret er å verna om akademisk fridom - som også er under press i mange land.

– Akademisk fridom handlar nemleg ikkje om å ha rett – men om å ha retten til å tenkja sjølv. Me treng ikkje gå langt ut over landegrensene for å sjå at akademisk fridom ikkje er sjølvsagt. I land der denne fridommen er under press, kan styresmaktene bestemma kva universiteta underviser, kva forskarar får seia og kva studentar kan meina. Nokre stader risikerer ein straff for å stilla feil spørsmål. Når kunnskap blir avgrensa og kritiske stemmer blir stilna, mistar samfunnet moglegheita til å utvikla seg til det beste for alle *inbyggere. Derfor er det viktig at me her i Noreg – og spesielt dykk som er her i dag – ikkje tek denne fridommen for gitt. Me må bruka den. Me må ta vare på den. Og me må stå opp for han, både for oss sjølve og for alle som ikkje har den same fridommen, seier rektor Hanne Solheim Hansen.

Elskar dyr

19 år gamle Leah Nathalie Hoel har ikkje berre eit halvår framfor seg. Ho har valt bachelor dyrepleie.

– Eg har alltid hatt lyst til å jobba med dyr. Eg har ikkje hatt nokon sjølv, men eg har passa dyr straks eg har hatt moglegheita, fortel ho.

Draumen har vore å bli veterinær - men ho er ærleg på at seks i snitt, det har ho ikkje. Dermed blir det den treårige utdanninga dyrepleie ved campus Bodø.

– Eg får då ei autorisering som dyrepleiar og kan då bli assistent for veterinærar, fortel ho.

Me har alle eit felles ansvar for å byggja eit godt studentmiljø. Me er sterkare saman

Rektor Hanne Solheim Hansen, Nord universitet

Leah har aldri før vore så langt nord. Det nordlegaste er Trondheim - og helga før studiestart kom ho saman med foreldra sine. No når dei har drege heim, er ho klar for studiar - og det å leva for seg sjølv.

– Eg gler meg til å styra på eiga hand og det å tilpassa kvardagen sjølv, seier ho.

Ho har strategien klar for både studiane og det sosiale.

– Eg har meldt meg på ei faddergruppe. Når det gjeld studiane skal eg prøva å halda orden og vera strukturert. Og så skal eg vera sosial, seier ho.

Fadderglede

Venninnegjengen Beatrice Smidstad, Ida Myklebust, Siren Munkvold og Ronja Gusgaard er andre års studentar i Human Resource Management (HRM) og fadrar for første gong.

– Me vart så gode venner allereie i fjor under fadderveka, at me allereie då bestemde oss for å vera fadrar i år, fortel dei.

Korleis dei no ser på første års studentane?

– Studentane er veldig spente og nervøse. Men dei verkar innstilte på å bli kjende med kvarandre, fortel dei.

Det å vera uredd og ta mot til seg, vera inkluderande - var også noko utanriksminister Eide gav råd om.

– Ver flinke studentar. Møt opp og les. Det lønner seg. Den andre halvparten er det fine, lærerike, gøyale og positive ein gjer medan ein er student. Ta del i det. Det er ei unik tid, seier Eide.