Frå vikar - til pedagogisk leiar

Rett ut av vidaregåande skule, visste ikkje Jesper Selsbakk i Bodø kva han ville gjera. Det førte han inn ein søknadsrunde til alt han fann – før ei venninne spurde om han kunne tenkja seg å prøva seg som assistent i ein barnehage. Tja, kvifor ikkje.

– Inga erfaring er bortkasta, så eg takka ja – og da eg begynte her fall ting på plass, fortel Selsbakk.

Det er no snart to år sidan han gjekk ut frå Nord universitet med sin ferske bachelorgrad i barnehagelærar-faget. Han er no pedagogisk leiar i Norlandia Tusseladden barnehage, fast tilsett i full stilling på same avdeling kor han sjølv trådde sine små barnesko. Og kor han også jobba som tilkallingsvikar under utdanning.

Raskt i arbeid

Selsbakk er i godt selskap, viser Nord universitets siste kandidatundersøking (pdf).

86 prosent av dei spurde meiner den noverande stillinga er svært relevant for studiet dei har teke. Undersøkinga viser også at kandidatane kjem raskt i jobb.

Fungerande rektor Levi Gårseth-Nesbakk, er fornøgd med dei siste tala.

– Årets rapport viser at arbeidsmarknaden framleis tek godt imot kandidatane frå Nord universitet og at kandidatane sjølv vurderer utdanninga som relevant.

– Når det er sagt viser tala at arbeidsmarknaden er noko strammare enn det som var tilfellet i førre rapport. Samtidig viser årets rapport ein høgare prosentdel av kandidatane som er fornøgd med studietida ved Nord enn ved førre undersøking, seier han.

Gårseth-Nesbakk er ansvarleg for undersøkinga, som blir gjennomført annakvart år for å måle om universitetet utdannar folk som har relevant kompetanse og er ettertrakta i arbeidsmarknaden.

– Sikker og viktig jobb

Samtidig er det slik at tek du bachelor barnehagelærar, ja – då er du sikra jobb.

– Vi er aldri for mange på jobb, og vi har eit veldig stort behov for pedagogar. Det blir berre færre og færre unge som vel å bli barnehagelærar, og det gjer at me no også slit med å få tak i assistentar.

Det fortel styrar Anniken Breivik i Norlandia Tusseladden barnehage i Grønnåsen i Bodø.

Paradokset er at det er ein god jobb, meiner Selsbakk. Ikkje berre god, men også viktig.

– Eg byrja på lærarutdanninga, berre for å oppdaga at eg sakna barnehagen. Før eg slutta var eg i praksis i ein 5. klasse i ei skule her i Bodø. Eg vil ikkje seie at det då er for seint, men grunnlaget me legg i barnehagen er viktig. Eg ville jobbe i barnehage for å vere med på å leggje eit godt grunnlag for barna vidare i skulen, seier han.

Selsbakk har ganske enkelt klokketru på tidleg innsats.

– Blir barna gode på sosial kompetanse og leik før dei byrjar på skulen, har dei gode føresetnadar for å lykkast, påpeikar han.