Andreas Raspotnik (til høgre) og Cho Jung-hee (president av Korean Maritime Institute), her avbilda i Busan der samarbeidsavtalen vart underskriven. Foto: Korea Maritime Institute (KMI).
Arctic Partnership Week er Sør-Korea sitt viktigaste arktiske forum. Landet har arrangert forumet årleg sidan 2016 som observatørstat i Arktisk råd. Den siste utgåva vart gjennomført i desember og markerte tiårsjubileet.
Andreas Raspotnik, direktør ved Nordområdesenteret på Handelshøgskulen ved Nord universitet, deltok på programmet etter invitasjon frå Korean Maritime Institute, KMI.
– Det er tydeleg interesse for nordiske erfaringar innan arktisk politikk og berekraftig utvikling, seier Raspotnik.
Dette vart tydeleg då Handelshøgskulen og KMI signerte ein samarbeidsavtale i løpet av veka. Avtalen vart signert av dekan Gry Agnete Alsos.
– Vi ser fram til å samarbeide med KMI om å vidareutvikle kunnskapen om nordområda. Koreansk interesse for Arktis gir nye perspektiv og innsikter i arbeidet vårt, seier Alsos.
– KMI er ein interessant samarbeidspartnar for å lære meir om asiatiske perspektiv.
Seminar om blå økonomi og politikk
Raspotnik heldt òg fleire presentasjonar under opphaldet i Sør-Korea.
På Korea–Arctic Blue Economy Cooperation Seminar snakka han om samarbeid mellom Sør-Korea og dei nordiske landa. Hydrogen og energiomstilling var sentrale tema.
På KoNAC & Expert Seminar drøfta han EU si rolle i arktisk politikk. Koreanske ekspertar som arbeider med grupper i Arktisk råd, deltok i diskusjonane.
– Arktis vert diskutert langt utanfor den arktiske regionen. Dialog med partnarar i Asia er viktig, seier han.
Møtte unge forskarar
Programmet inkluderte òg ei Arctic Youth Session. Raspotnik møtte unge forskarar og studentar. Dei diskuterte framtidig forsking og samarbeid om arktiske spørsmål.
– Arktiske spørsmål engasjerer alle, frå politikarar til barnehagebarn som spør om isbjørnar et menneske, seier Raspotnik.
Kjell Stokvik og Bjørn Gunnarsson frå Center for High North Logistics deltok òg. Dei presenterte arbeid med arktisk logistikk og infrastruktur.
– Besøket bidrog til å styrkje dialogen mellom koreanske og nordiske partnarar som arbeider med arktisk forsking og politikk, konkluderer Raspotnik.
