Historisk studiestart i barnehagen på Støren

– Dette er ei historisk satsing, og det er så stort for oss, seier ei begeistra Ann Kristin Landsem ved Studiesenter Trøndelag sør.

– Vi har jobba lenge for å få dette til. Behovet i regionen er stort, og no får fleire moglegheit til å ta høgare utdanning utan å måtte flytte herifrå, seier ho.

Dette blir ei reise som vil forandre dykk!

Ann Kristin Landsem, Studiesenter Trøndelag sør

Den unike barnehagelærarutdanninga er samlingsbasert, går over fire år og har tre samlingar i semesteret – i sjølve barnehagen (sjå faktaboks).

Tilbodet gjer studiet mogleg

For Mette Hoel (26) og Malin Anthonsen (26) frå Ålen var plasseringa heilt avgjerande:

– For meg, med små barn og jobb, hadde det ikkje gått utan at dette tilbodet vart lagt hit i Støren, seier Malin.

Det same gjeld for Mette, som no er klar for å ta fatt på draumen om å bli barnehagelærar.

– No ser eg verkeleg fram til å kome i gang.

Adrian Holen Ledal (26) frå Oppdal er også klar for fire år med studiar.

– Det er litt skummelt, men mest spennande. Eg vil utvikle meg, og dette kjennest heilt rett. Eg er trygg på at eg har gjort eit riktig val, seier han.

For mange betyr studiet meir enn berre ei ny retning i livet – det gjev faktisk moglegheita til å ta utdanning.

– Eg er barne- og ungdomsarbeidar, og har jobba i barnehage sidan 2013. Eg har kjent på at eg treng meir fagleg påfyll. Som småbarnsmor hadde eg aldri klart dette utan eit lokalt tilbod, seier Karin Haugmo Hoel (32) frå Oppdal.

Bente Anita Vognild (34) nikkar samd:

– Med små barn og full jobb er dette det einaste realistiske alternativet.

Praksisnært som aldri før

– Nærmare praksis kjem du ikkje, seier Elin Børve ved Nord universitet, som er ein av initiativtakarane bak studiet.

Det er no halvanna år sidan ho vart kontakta av Studiesenter Trøndelag sør, og er full av lovord over samarbeidet med dei og med Støren barnehage.

– Her er studentane midt i det verkelege barnehagelivet. Dei får lære saman med erfarne fagfolk, og vere tett på barna frå første dag, seier ho.

De har gjort eit veldig godt val. Ver stolte av det. Og ver merksame på at de blir attraktive på jobbmarknaden etterpå.

Elin Børve, Nord universitet

Ordførar i Midtre Gauldal kommune, Trude Solem Heggdal, deltok og på opninga:

– Ein god barndom varer heile livet. Og ein god start på livet er kjempeviktig, mellom anna for å unngå utanforskap.

Studentane vart tekne imot med song frå barnekor, varme talar – og både latter og tårer. Solveig Salthammer Kolaas frå Nord universitet rørte mange med si tolking av ein song om kvardagsheltar i barnehagen (sjå video øvst i artikkelen).

Eit løft for regionen

Nord universitet står bak deltidsutdanninga, og prodekan Vegar Sellæg la stor vekt på kor viktig denne utdanninga er.

– Barnehagelærar er kanskje den viktigaste utdanninga vi har. Så gratulerer med eit veldig godt val. Samstundes veit eg at dette vil krevje mykje arbeid og struktur av dykk, men vi skal støtte dykk heile vegen.

Tør å spørje oss - alltid!

Berit Stornes, einingsleiar i Støren barnehage

Også varaordførar og barnehagelærar Stian Engen understrekar verdien av praksisnær læring:

– Studentane kjem til ein barnehage med ekstremt mykje kompetanse, så her vil studentane få lære mykje.

Verdas beste jobb

Men kva er eigentleg det aller beste med å jobbe i barnehage? Mange av dei ferske studentane har allereie relevant jobberfaring, og dei er ikkje i tvil:

– Det er å få lov til å vere meir leiken og møte uskyldige barn som har ein heilt annan glede i kvardagen enn det dei fleste andre menneske har, seier Adrian Holen Ledal.

Bente Vognild er heilt einig:

– Det beste med å jobbe i barnehage, er å få tid med barna, følgje dei i leiken og få sjå utviklinga deira, smilar ho.

Varaordførar Stian Engen er heller ikkje i tvil:

– Det aller finaste er å bli møtt med opne armar kvar dag. Det får du ikkje som varaordførar, smiler han.

Det unike utdanningstilbodet har fått mykje merksemd.

– Studiet er eit viktig bidrag til rekruttering i regionen – og ei moglegheit til å ta utdanning på ein heilt ny måte, seier Ann Kristin Landsem.